"ГАГАУЗИЯ ПРАВОСЛАВНАЯ". Церковный сайт из Конгаза

(В12) Священное Писание

22

Дююня чаармак ичин пилда

1 Иисус, аннадарак оннара пилдаларлан, деди: 2 "Гёк Падишахлыы бензеер бир падишаха, ани дююн йапты оолуна. 3 Йоллады изметчилерини, сенселеи дююня чаарсыннар; ама оннар истямедиляр гелмяя. 4 Гене йоллады, башка изметчилерини, дейип: "Соляйин чаарылмышлара: Софра курулу, даналар хем бесли хайваннар кесили, хепси хазыр, гелин дююня!" 5 Ама оннар, есаба алмайып, кимиси гитти тарласына, кимиси алыш-веришиня. 6 Каланы, тутуп изметчилери, гюлмяя алдылар оннары, хем ёлдюрдюляр. 7 Буну ишидип, падишах юфкеленди; йоллады аскерлерини, да ёлдюрюжюлери йок етти, хем касабаларыны йакты. 8 Сора изметчилериня деди: "Дююн хазыр, ама чаарылмышлар диилдиляр йакышык гелмяя. 9 Гидин сокаклара, чаарын дююня хепсини, кими буладжэныз".   10 Чыкып сокаклара, изметчиляр, кими гёрдюляр, ии кётю, хепсини топладылар; да дююн аулу долду мусаафирлен. 11 Падишах, гелип мусаафирлери гёрмяя, бирини булду гийинмемиш дююн рубасына; 12 хем деди она: "Аркадаш! - сян насыл бурайи гелдин дююн рубасыз?"  Q адам сусарды.  13 Озаман падишах изметчилериня деди:"баалайын онун еллерини хем айакларыйыны, да атын дышаркы караннаа; орада оладжэк ааламак хем диш гыджыртысы". 14 Зеря чаарылмыш чок, ама айырылмыш ааз".

Хак Кесаря хем Аллаха

15 Озаман фарисейляр гидип аннаштылар, насыл тутсуннар Иисусу лафлан. 16 Йолладылар Она кенди ююренджилерини Иродун адамнарыннан биля, дееряк: "Ююредиджи, билериз ки Сян дооруджуйсун, хем акына ююредерсин Аллахын йолларына, хем чалышмэрсын йаратмаа биркимсейя, зеря инсан айырмэрсын. 17 Сёля бизя, несой сайэрсын? дюшер ми харч ёдемяя Кесаря, оса дюшмеер ми?" 18 Иисус, гёрюп оннарын ширетлиини, деди: "Нечин денеерсиниз Бени, икиюзлюляр? 19 Гёстерин парайы, нейлян харч ёдерлар. Оннар гетирдиляр бир динар. 20 Иисус сорду: "Кимин ресими хем ады йазылы бурада?" 21 "Кесарын", - дедиляр. Озаман Иисус оннара деди: "Не Кесарын, верин Кесаря, ама не Аллахын, верин Аллаха." 22 Буну ишидип шаштылар, хем бракып Иисусу гиттиляр.

Соруш дирилмяк ичин

23 Хеп о гюню гелди саддукейляр, ани деерлар ки дирилмяк йокмуш, да сордулар: 24 "Ююредиджи! Моисей деди: „Еер биркимсей ёлярса ушаксыз, озаман онун кардашы лязым евленсин онун дулуна, ки браксын тамазлык ёлмюш кардашына дейни“. 25 Варды биздя еди кардаш. Илкинки евленди да ёлдю. Ушаа йокту дейни, карысыны бракты кардашына. 26 Хеп ёля олду икинджийлян да, ючюнджюйлян да, таа единджийадак. 27 Биткидя ёлдю кары. 28 Дирилмяк гюнюндя, о едидян кимин карысы о оладжэк? Зеря хепси онуннан евлийди". 29 Иисус джувап етти оннара: "Йанылэрсыныз, зеря билмерсиниз не Йазылары, не да Аллахын куведини. 30 Зеря дирилмектян сора евленмерлар, ама булунэрлар гёклердя ниджя Аллахын ангеллери. 31 Окумадыныз мы не Аллаа сёлеер ёлюлерин дирилмеси ичин: 32 "Бян Авраамын Аллахы, хем Исаакын Аллахы, хем Иаковун Аллахыйым“. Аллаа дирилерин Аллахы, ама диил ёлюлерин". 33 Ишидип, инсан шашарды Онун ююретмесиня.

Ен бююк изин

34 Фарисейляр, ишидип ани Иисус сустурду саддукейлери, топландылар бирери. З5 0ннарын бири, законджу, денейеряк Ону, сорду: 36 "Ююредиджи, ангы изин ен бююк Законда?" 37 Иисус она деди: "Сев Сааби Аллахыны бютюн юряяннян, бютюн джаныннан, хем бютюн аклыннан". 38 Бу илк хем ен бююк изин. 39 Икинджи, она бензяр: "Сев йакындакыйы ниджя кендини".  40 Бу ики изиндя баалы бютюн закон хем пророклар".

Христос - кимин оолу?

41 Фарисейляр топландыйнан, Иисус оннара сорду: 42 "Не дюшюнерсиниз Христос ичин? Кимин оолу О"?  "Давидин", дедиляр. 43 Иисус оннара деди: "Оляйса, ниджя Давид, Айоз Духун йардымыннан, Она деер "Сааби", хем сёлеер: 44 „Сааби деди Саабимя беним: "Отур саа тарафымда, Бян дюшюрюнджя Сенин душманнарыны айакларынын алтына"? 45 Ачан Давид Она деер "Сааби", насыл О олабилир Давидин оолу? 46 Кимсей джувап едямеди Она бир да лаф. О гюндян сора, кимсей кыйлышмады Она сормаа бишей.

(В12) Священное Писание

20

Баа ишчилери ичин пилда

1 Гёк Падишахлыы бензеер бир ев саабисиня, ани чин сабаален чыкты кенди баасына ишчи тутмаа. 2 Аннашып ишчилярлян бир динара гюндя, йоллады оннары баайына. 3 Ючюнджю саатта чыкып, башка хайлак ишчи гёрдю. 4 Оннара да деди: "Сиз да гидин беним баайымда ишлемяя. Не дюшер, ёдейджам сизя".  Оннар да гиттиляр. 5 Сора, чыкып саат алтыда хем докузда, хеп ёля йапты. 6 Сонунда, онбиринджи саатта, булду таа хайлак дураннары, да деди оннара: "Нечин хайлак дурэрсыныз бютюн гюн?" 7 Оннар дедиляр: "Бизи кимсей ишя алмады". О деди: "Сиз да гидин беним баайыма, хем не дюшярса, кабледеджениз". 8 Авшамнеен баайын саабиси векилиня деди: "Чаар ишчилери да ёдя, илкин сонунда геленнеря, сора да илкинкилеря". 9 Оннар, ани гелдиляр ишя онбиринджи саатта, каблеттиляр биряр динар. 10 Илкинкиляр дюшюндюляр, ани кабледеджекляр таа чок, ама каблеттиляр хеп биряр динар. 11 Алып парайы, чекеттиляр ев саабисиня мырылданмаа, 12 хем сёленмяя: "Бу биткиляр ишледиляр саде бир саат, биз са бютюн гюнюн зооруну хем кызгынныыны чектик, сян са бизя биртюрлю ёдеерсин". 13 Сааби оннарын бириня деди: "Достум! бян кюстюрмедим сени; аннашмадык мы бир динара? 14 Ал пайыны, да гит; бян  бу адама ёдярсам хеп ниджя сана, 15 йок му доорулуум кенди варлыымнан йапайым, не истеерим? Оса иилиими чок му гёрерсин?" 16 Бутакым, биткиляр илк оладжэклар, илкляр да битки; зеря чок чаарылмыш, ама аз айырылмыш.

Иисус ёлюмюню хем дирилмесини хаберлеер ючюнджюляя

17 Иерусалимя гидяркан, Иисус йолда оники ююрениджисини алды бир тарафа, да оннара деди: 18 "Те, биз гирериз Иерусалимя; Инсан Оолуну баш попазлара хем кийатчылара вереджекляр, да оннар суд кеседжекляр ёлдюрмяя Ону, 19 хем вереджекляр Ону пэгыннара, ки азарласыннар, дююсюнняр, хем ставроза герсинняр; ама ючюнджю гюню О дириледжек".

Зеведейлерин истемеси

20 Озаман йаклашты Она Зеведейлерин анасы, оолларыннан барабар, баш иилтти да неся йалварды.   21 О сорду: "не истерсин?"  Кары деди: "Изин вер, ки Сенин Падишахлыында беним ики оолум отурсуннар бири Сенин саа тарафында, бири да сол тарафында".   22 Озаман Иисус деди: "Билмерсиниз, не истерсиниз. Вар мы ниджя ичясиниз о чёлмектян, ани Бян ичеджам, хем ватиз оласыныз о ватизликлян, ани Бян оладжам?" Оннар деди: "Вар ниджя".  23 Озаман Иисус сёледи: "Беним чёлмеемдян ичеджениз, хем ватизликлен, ани Бян ватиз олэрым, ватиз оладжэныз, ама изин вермяя отурмаа саа еки сол тарафымда, Беним елимдя диилдир: бу вериледжек Бобамдан, кимя О хазырлады." 24 Ишидип буну, калан он ююрениджи бу ики кардаша юфкелендиляр. 25 Иисус, чаарып оннары, деди: "Сиз билерсиниз, ани халклары кулланэр чорбаджылары, хем заабитлик едеер ёндерджилери. 26 Ама сизин аранызда бёля олмасын. Ким истярса бююк олмаа, о изметкяр олсун каланына. 27 Хем ким истярса илк олмаа, о чырак олсун ёбюрлеря. 28 Зеря Инсан Оолу гелмеди, ки Она измет етсинняр, ама Кенди измет етсин дейни инсана, хем версин джаныны башкалары ичин, ки куртарсын дейни оннары".

Ики кёр Иерихон касабасында

29  Иерихондан чыкаркана, Онун ардына чок инсан гидярди.  30 Да те, ики кёр адам, ани отурардылар йол бойунда, ишиттийнан, ани Иисус гечер орадан, чекеттиляр баармаа: "Сааби, Давидин Оолу, аджы бизи!"  31 Инсан сустурарды оннары, оннарса таа пек баарарды: "Сааби, Давидин Оолу, аджы бизи!" 32 Дуруп, Иисус чаарды оннары да деди: "Не истеерсиниз Бендян?" 33 Оннар деди: "Сааби! Ачылсын бизим гёзлеримиз!" 34 Иисусун джаны аджыды, да дииди оннарын гёзлериня; осаат оннар гёрмяя башладылар, да Иисусун ардына гиттиляр.

21

(В12) Священное Писание

Иисус гирер Иерусалимя

1 Иерусалимя гидяркан, оннар етиштиляр Вефагийайа, Елеон байырына. Орада Иисус чаарды ики юренджисини да деди: 2 "Гидин каршыдакы кюйя, да орада буладжэныз бир баалы ешек, кодуу йанында. Чёзюн оннары, да гетирин Бана; 3 Еер биркимсей сизя бишей дяярса, сёляиниз, ани оннар ляязым Саабийя; хем оннары сора геери йоллайаджэк". 4 Буннар хепси олду, ки таманнансын дейни, не сёлемишти пророк, ани деер: 5 "Сион кызына сёляин*:  Те, сенин Падишахын гелер сана, услулукта, атлы ешектя хем кодукта". 6 Юренджиляр гидип йаптылар ёля, ниджя сымарлады Иисус. 7 Ешяя кодууннан гетирдийнан, оннарын юстюня дёшедиляр руба, да О пинди атлы оннара. 8 Чок инсан йола рубаларыны дёшярди, башкалары, дал кесип фиданнардан, йол юстюня сыбыдардылар. 9 Иисусун ёнюндя хем аардында гидян инсан баарарды: "Осанна** Давидин Оолуна! Иисёзлюдюр Саабинин адына Гелян! Осанна ююсек гёклердя!" 10 Ачан Иисус гирди Иерусалимя, бютюн касаба кайнамаа чекетти. Хепси сорардылар: "Ким Бу?" 11 Башкалары джувап едярдиляр: "Иисус, Галилейанын Назаретиндян пророк".

Иисус паклэр клисе евини

12 Иисус Аллахын клисе евиня гирди, да коолады орадан алыш-вериш йапаннары; девирди пара дииштириджилерин масаларыны, хем гугуш сатыджыларын скемнелерини. 13 Хем деди оннара: "Вар йазылы: „Беним евимя дуа еви денеджек:" ама сиз ону йаптыныз хайдут ини". 14 Хем гелдиляр Она кёрлар хем топаллар, да О алыштырды оннары. 15 Башпопазлар хем кийатчылар, гёрюп минуниялары, ани О йапты, хем ушаклары, ани баарардылар, хем клисе евиндя сёлярдиляр: "Осанна Давидин Оолуна!", юфкелендиляр, 16  хем дедиляр Она: "Ишидерсин ми не оннар сёлерлар?" Иисус деди:  Ишидерим! Сиз окумадыныз мы Йазылары: "Евлатларын хем гююстя ушакларын аазындан Сян метинник йараттын?" 17 Сора бракып оннары, касабадан чыкты Вифанийа кюйюня, хем орада геджеледи.

Мейвасыз инжир фиданы

18 Сабаален, касабайа дёндюйнян, Иисус аджыкты. 19 Йол бойунда бир инжир фиданы гёруп, она йаклашты, ама йапрактан кааря онда бишей булмады, да деди: "Бундан ётяя мейва йапмайасын!" Фидан осаат куруду. 20 Буну гёрюп, юренджиляр шаштылар: "Насыл бу инжир фиданы бёля тез куруду?" 21 Иисус оннара деди: "Аслы сёлерим, еер инан оларса сиздя, хем икилямярсайдыныз, сиз йападжэйныз диил салт буну, не бу фиданнан олду, ама дейеджейниз бу байыра: „Калк да атыл денизя“, - о да оладжэк. 22 Инаннан дуа едярсайдыныз, не истейеджениз, кабледеджениз".

Иисусун заабитлии

23 Ачан Иисус клисе евиня гелди да инсаны ююредярди, гелдиляр Она башпопазлар хем халкын ихтиарлары, да дедиляр: "Кимин кувединнен йапэрсын бу ишлери, хем ким верди Сана бу заабитлии?" 24 Иисус джувап етти: "Койаджам Бян да сизя бир соруш. Джувап един Бана, сора Бян да сизя солейджам, не заабитликлян йапэрым бу ишлери. 25 Иоанын ватизлии нередян? Гоктян ми оса инсандан мы?" Оннар бири-бириннян лафеттиляр: "Еер дейарсак: „Гёктян“, О дейеджек: „Оляйса, нечин ону инанмадыныз?“ 26 Ама дейарсак: „Инсандан“, - коркэрыз халктан, зеря хепси инанэр, ани Иоан пророк"* 27 Онуштан джувап еттиляр Иисуса: "Билмериз". О да деди оннара: «Бан да сизя сёлямейеджам,  не заабитликлян" йапэрым бу ишлери.

Ики оол ичин пилда

28 Ниджя дюшюнерсиниз? Бир адамын варды ики оолу; йаклашып илкиня, о деди: "Оолум, гит бююн да ишля беним баайымда“. 29 Оолу джувап етти: „Истямеерим“; ама сора, пишман олуп, гитти. 30 Сора йаклашты икинджисиня, да хеп бёла деди. Бу джувап етти: „Гидерим, чорбаджы!“, ама гитмеди. 31 Ангысы оннарын таманнады бобанын истедиини?"  "Илкинкиси", - джувап етти оннар. Иисус деди: "Аслы сёлеерим сизя, ани харччылар хем маскаралар* сизин ёнюнюздя Гёк Падишахлыына гидерлар. 32 Зеря Иоан гелди сизя ии йоллан, ама сиз ону инанмадыныз, ама харччылар хем маскаралар инандылар. Сиз бу ишлери артык гёрдюнюз, ама пишман олмадыныз, хем инанмадыныз.

Фена бааджылар ичин пилда

33 Сесляйин бир башка пилда: варды бир ев чорбаджысы, ани койду баа, долайлады ону ауллан, ортада тяска ерлештирди, йапты бекчи кулеси, сора баайы верип бааджылара, башка еря гитти. 34 Ачан гелди юзюм вакыды, йоллады бааджылара чыракларыны - алсыннар берекети. 35 Бааджылар, тутуп чыраклары, бирини дююдюляр, ёбюрюню ёлдюрдюляр, кимисиня ташлан урдулар. 36 Сааби йоллады башка чыракларыны, таа зеедя некадар илкин, ама оннарлан да йаптылар хеп ёля, ниджя илкинкилярлян. 37 Сонунда йоллады оннара кенди оолуну, да деди: "Беним оолумдан утанаджэклар“. 38 Ама бааджылар, гёрюп оолу, дедиляр бири-бириня: "Тя чорбаджынын оолу, хайди ёлдюрелим ону, да баа бизя каладжэк“. 39 Туттулар ону, да чыкарып баадан бир тарафа, ёлдюрдюляр.   40 Баайын чорбаджысы гелдийнан, не  йападжэк бу бааджыларлан?" 41 Оннар дедиляр: "Бу феналары зеетлейип, ёлдюреджек; баайы да башка бааджылара вереджек, ани берекети она вереджекляр вакыдында".  42 Иисус деди оннара: "Окумадыныз мы Йазыларда: "Таш, ангысыны усталар беенмедиляр, кёшенин башына койулду; бу Саабидяндир, хем гёзлеримизин ёнюндя шашмаклы иш"?  43 Онуштан сёлеерим сизя, ани Аллахын Падишахлыы сиздян алынаджэк, да башка миллетя вериледжек, ани вакыдында онун берекетини вереджек. 44 Хем ким о таш юстюня дюшеджек, о кырыладжэк, хем кимин юстюня о таш дюшеджек, ону езеджек". 45 Ишидип бу пилдалары, башпопазлар хем фарисейляр аннадылар, ани О сёлер оннар ичин. 46 Да истедиляр тутмаа Ону, ама инсандан корктулар, зеря Ону пророк сайардылар.

(В12) Священное Писание

19

Кары-коджанын айырылмасы ичин

1 Бу лафлары башардыйнан, Иисус Галилейадан чыкты, да гечти Иудейа ерлериня, Иорданын ёбюр тарафына. 2 Онун ардына чок инсан гитти, да О орада хасталары алыштырды. 3 Йаклашты Она фарисейляр, да Ону денейеряк, дедиляр: "Йакышер мы адам айырылсын карысындан хер себеплян?" 4 Иисус джувап етти: «Не, окумадыныз мы, ани Йарадыджы баштан йаратты инсаннары олсуннар адам хем кары. 5 Хем деди: „Онуштан, адам бобасыны хем анасыны бракаджэк, да карысына йаманаджэк, хем икиси бирлешеджекляр, 6 ёля, ани диил ики, ама бир гююдя оладжаклар. Хем не Аллах бирлештирди, инсан ону айырмасын». 7 Оннар сордулар: "Ёляйса, нечин Моисей сымарлады  вермяя карыйа айырылмак кийады, да айырылмаа ондан?" 8 Иисус сёледи: "Моисей сизин серт юреклеринизя гёря бракты айырыласыныз карыларныздан, ама баштан диилди бёля. 9 Бян са сёлеерим сизя: Ким карысыны бракэр ороспулуктан кааре башка себеплен, да башкасына евленер, о ороспулук едер. Хем ким айырылык карыйа евленер, о ороспулук едер. 10 Онун ююрениджилери дедиляр: "Еер адам бёля баалыйса карыйа, озаман таа ии евленмемяя!" 11 О деди оннара: "Хепси кабледямеер буну, ама саде оннар, кимя верили. 12 Зеря вар евленмейязляр - дуумасындан. Хем вар евленмейязляр инсандан йапылы. Хем да вар евленмейязляр истейипта, Гёк Падишахлыы ичин. Ким кабледябилир буну, каблетсин".

Иисус иисёзлеер ушаклары

13 Озаман гетирдиляр Она ушаклары, ки койсун еллерини оннара хем дуа етсин; ююрениджиляр са азарладылар оннары. 14 Иисус деди: "Колверин ушаклары, хем инкяр етмейин Бана гелсинняр; зеря Гёк Падишахлыы бёлеляр ичин". 15 Еллерини оннара койдуктан сора, Иисус гитти орадан.

Зенгинник хем дивеч йашамак

16 Бир адам, йаклашып, сорду Она: "Мутлу Ююредиджи! не иилик йапайым, ки дивеч йашамак еденейим?" 17 Иисус деди она: "Нечин Бана деерсин мутлу? Салт бир Аллах мутлу. Еер истярсан дивеч ёмюря гечмяя, таманна изиннери". 18 О сорду: "Ангыларыны?"  Иисус она сёледи: "Ёлдюрмя, ороспулук етмя, чалма, йаланджы шаат етмя, 19 сай бобаны-ананы, хем сана йакын оланы сев ниджя кендини". 20 Генч олан жувап етти: "Хепсини буннары таманнадым таа генчлиимдян. Не таа бана етишмеер?" 21 «Еер истярсан таман олмаа, гит варлыыны сат, хем даат фукааралара, да гёктя хазня еденеджян. Сора да гел Беним ардыма". 22 Ишидип буну, генч олан гюдженди, зеря чок зенгиннии варды. 23 Иисус деди ююрениджилериня: "Доору сёлеерим сизя, ани зенгин адам Гёк Падишахлыына зор гиреджек! 24 Хем да сёлеерим, ани таа илин девя ииня кулаандан гечсин, некадар зенгин адам Аллахын Падишахлыына гечсин". 25 Ишидип буну, ююрениджиляр шаштылар да дедиляр: "Озаман ким куртулабилир?" 26 Иисус, оннара бакып, деди: "Инсана бу олмаз, ама Аллаха хепси олур". 27 Озаман Петри деди: "Тя, биз брактык хепсини да гелдик Сенин ардына. Бизя не оладжэк?" 28 Иисус деди оннара: "Доору сёлеерим сизя, ани ени заманда, ачан Инсан Оолу Кенди метиннииндя чорбаджылык скемнесиня отураджэк, сиз, ани гелдиниз Беним ардыма, отураджэныз оники чорбаджылык скемнелериндя, даава кесеряк Израилин оники тамазлыына. 29 Хем хепси, ким бракаджэк евини, йада кардашларыны, кызкардашларыны, бобасыны, анасыны, /карысыны,/ ушакларыны, еки мерасыны Беним адым ичин, о кабледеджек юз катына таа чок, хем да еденеджек дивеч йашамак. 30 Хем чойу илк оланнар оладжэклар битки, хем битки оланнар оладжэклар илк.