"ГАГАУЗИЯ ПРАВОСЛАВНАЯ". Церковный сайт из Конгаза

12

Не дюшер йапмаа джумертеси?

1 О вакыт гечярди Иисус джумертеси гюню екин тарлаларындан; Онун юренджилери аджыктыйдылар, да чекеттиляр копармаа башаклары, да имяя. 2 Гёрюп буну, Фарисейляр дедиляр Она: "Бак, Сенин юренджилерин йапэрлар не дюшмеер джумертеси гюню". 3 Иисус деди оннара: "Окумадыныз мы, не йаптыйды Давид хем кафадарлары, ачан аджыктылар? 4 Ниджя о гирди Аллахын евиня, да иди екмеклери, ани Аллахын ёнюня койуларды, ангыларыны попазлардан кааре дюшмярди исин биркимсей?   5 Оса окумадыныз мы Законда, ани попазлар храмда джумертелерини тутмэрлар, ама кабаатсыз калэрлар? 6 Ама Бян сизя сёлерим, ани бурада булунэр те О, Ким таа бююк храмдан. 7 Еерь сиз аннасаныз буну: "Истеерим аджыйаннык, ама диил курбан", озаман маана булмайаджэныз кабаатсызлара. 8 Зеря Адам Оолу джумертеси гюнюн да Саабиси".

Сакат еллян адам

9 Иисус орадан гидип, гирди оннарын синагогасына. 10 Орада булунарды бир адам, ели сакат. Да сордулар Иисуса, ки кабаатлы булсуннар Ону: "Дюшер ми джумертеси гюню алыштырмаа хастайы?" 11 0 джувап етти оннара: "Вар мы сизин аранызда биркимсей, кимин койуну дюшярса чукура джумертеси гюню, чыкармасын ону орадан? 12 Некадар таа паалы адам бир койундан! Онуштан джумертелериндя дюшер иилик йапмаа". 13 Сора деди бу адама: "Узат елини!" О узатты, да ели саа олду ёбюрю гиби. 14 Фарисейляр, чыкып дышары, аннаштылар , несой олдюрсюнняр Иисусу. Буну дуйуп, Иисус узаклашты орадан.

Иисусун услулуу

15 Онун ардына чок инсан гитти, да О хепсини оннары алыштырды. 16 Хем сымарлады, ачыкламасыннар Ону башкаларына, 17 ки таманнансын, не сёлендийди пророк Исайадан: 18 "Те, Беним изметкярим, ани Бян айырдым, Беним Севдиим, Ангысында хошланэр джаным!  Кенди Духуму Она койаджам, да хаберлейеджек миллетлеря суд. 19 О кавга йапмайаджек, бармайаджек, хем сокакларда Онун сесини хич бири ишитмейеджек. 20 Езилмиш сазы кырмайаджэк, хем тютян фитили сюндюрмейеджек, сонунда дорулаа енсемяк вереджек. 21 Миллетляр Онун адына умутланаджэклар".

Иисус хем Веелзевул (шейтан)

22 Сора гетирдиляр Она бир кёр хем муту адам, фена духтан тутулу. Иисус алыштырды ону, да адам башлады гёрмяя хем лафетмяя. 23 Хепси инсан шашты да деди: "Диил ми аджаба бу Христос, Давидин оолу?» 24 Буну ишидип, фарисейляр дедиляр: "О чыкарэр фена духлары веелзевулун, фена духларын ёндерджисинин кувединнян!" 25 Иисус, билеряк оннарын дюшюнмеклерини, сёледи: "Хербир падишахлык, еер бёлюнярса ичиндя, о дааладжек; Хеп ёля,  хербир касаба, йаки ев, ани бёлюнерлар ичиндя, оннар дурамэрлар. 26 Еер шейтан кооларса шейтаны, о ичиндя бёлюнер; вар мы насыл озаман онун падишахлыы дурсун?  27 Еер Бян кооларсам фена духлары веелзевулун кувединнян, озаман сизин адамнарыныз кимин кувединнян коолэрлар? Бу бетеря, оннар суд сизя кеседжекляр. 28 Еер Бян фена духлары кооларсам Аллахын Духуннан, елбетки, озаман Аллахын Падишахлыы етишти сизя да. 29 Несой вар насыл биркимсей гирсин каави оланын евиня да чалсын онун варлыыны, еер илкин бааламарсайды ону? Салт ондан сора вар насыл сойсун онун евини. 30 Ким диил Бенимнян, о каршы Бана. Ким топламэр Бенимнян, о даадэр. 31 Онуштан сёлерим сизя, ани инсаннарын хербир гюнах хем кётю лафы аф едиледжек, ама Айоз Духу кётюлемяк аф едилмейеджек инсаннара. 32 Ким лафедеджек Адам Оолуна каршы, аф едиледжек она. Ама ким лафедеджек Айоз Духа каршы, она аф едилмейеджек не бу дюнняяда, не да гелян дюнняяда.

Фидан хем онун мейвалары

33 Кайыл олун, ани ии фиданын мейвасы да ии, ама йабан фиданын мейвасы да йабан, зеря фидан мейвасындан танынэр. 34 Йылан йаврулары! Вар мы насыл сиз ии лаф сёлейясиниз, ачан кендиниз фенайсыныз? Зеря адамын аазы лафедер юряян долусундан. 35 Ии адам ии хазнесиндян ии ишляр чыкарэр; ама фена адам фена хазнесиндян фена ишляр чыкарэр. 36 Сёлерим сизя, ани суд гюнюндя инсан джувап едеджек хербир бош лаф ичин, ани сёледи. 37 Зеря кенди лафларындан доору чыкаджан хем кенди лафларындан кабаатлы каладжан".

Пророк Ионанын нышаны

38 Озаман билгичлердян хем фарисейлердян кимиси дедиляр: "Ююредиджи! истеериз гёстерясин бир нышан!"  39 О джувап етти оннара: "Кётю хем ороспу (прелюбодейный ) сенселя истеер нышан, ама верилмейеджек она башка нышан, пророк Ионанын нышанындан кааря. 40 Зеря ниджя Иона дурду юч гюн хем юч геджя иири балыын шкембесиндя , хеп ёля Адам Оолу да дураджэк юч гюн хем юч геджя ерин койнусунда. 41 Ниневийа инсаннары суд гюнюндя калкаджэклар да бу сенселеи кабаатлы буладжаклар, зеря оннар, Ионанын насаадыны ишидип, кенди гунахларындан Аллаха дёндуляр; да те, бурада Ионадан таа бююк Бириси вар. 42 Ююлень тарафындан падишахка калкаджэк суда бу сенселяйлян, да кабаатлы буладжек ону; зеря о гелди дуннейин кенарындан, ки ишитсин Соломонун арифлиини дейни; да те, бююн бурада булунэр Соломондан таа бююк Бириси.

Фена дух дёнер геери

43 Ачан фена дух чыкэр адамдан, о гезер курак ерлердя да раатлык аарэр, ама буламэр. 44 Озаман деер: "Дёнейим евимя, нередян чыктым". Гелдийнан, булэр ону бош, сюпюрюлмюш хем донаклы. 45 Сора гидип, алэр кендисиннян башка еди дух, таа фена, некадар кендиси, да евя гирип, ерлешерлар орада. Бутакым, адамын сон халы таа кётю олэр, некадарды илкин. Бутюрлю оладжэк бу фена сенселяйлян да".

Иисусун Анасы хем кардашлары

46 Ачан О насаат едярди инсана, Онун анасы хем кардашлары дышарда дурудулар, да истярдиляр Онуннан лафетмяя. 47 Биркимсей деди Она: "Бак, Сенин Анан хем кардашларын, дышарда дуруп, истеерлар Сениннян лафетмяя". 48 Иисус джувап етти хабер вереня: «Ким Беним Анам? хем ким Беним кардашларым?» 49 Да, гостерип елиннян юрениджилериня, деди: "Тя Беним анам хем кардашларым! 50 зеря ким таманнайаджэк Беним Гёктеки Бобамын истедиини, о Бана кардаш, хем  кызкардаш хем ана".

(В12) Класс Священное Писание

10

Оникиси йолланэрлар изметя

1 Чаарып Кенди оники юренджилерини, Иисус верди оннара кувет фена духлары кооламаа, хем алыштырмаа хертюрлю хасталыклары хем дертлери. 2 Оники Апостолун адлары буннардыр: илкинки Симон, ангысына Петри дейярдиляр, хем онун кардашы Андрей; Иаков, Зеведейин оолу, хем онун кардашы Иоан; 3 Филип хем Варфоломей; Фома хем Матей харччы; Иаков, Алфейин оолу, хем Леввей, ангысынын лаабы Фаддей; 4 Симон Кананит хем Иуда Искариот, ангысы сатты Иисусу. 5 Буннары оникисини Иисус йоллады, хем сымарлады: "Язычниклерин йолларына гитмейин, Самарийа касабаларына уурамайын; 6 Илкин гидин Израиль миллетин кайып койуннарына. 7 Гидеряк, аннадын, ани йаклашты Гёк Падишахлыы. 8 Хасталары алыштырын, лепралылары (прокаженных) паклайын, ёлюлери  дирилдин, фена духлары коолайын. Не каблеттиниз парасыз, верин парасыз. 9 Алмайын кушааныза не алтын, не гюмюш, не бакыр. 10 Йолджулук ичин не торба, не ики кат руба, не айак кабы, не да  сопа алын. Зеря ишчийя йарашэр дойурулсун. 11 Ангы касабайа хем кюйя гиреджениз, юренин ким орада таа ии адам, да калын онда, орадан чыкынджа. 12 Ангы евя гиреджениз, селям верин: "Уйгуннук евинизя!“ 13 Еер о ев кямильса, сизин селяминиз кабул едиледжек, ама диил са кямиль, селяминиз сизя геери дёнеджек. 14 Еер биркимсей каблетмярса сизи хем сеслямярса лафларынызы, о евдян, еки касабадан, чыктыйнан, тозлары да айакларыныздан паклайыныз. 15 Дору сёлерим сизя, ани суд гюнюндя Содом хем Гоморра касабаларына таа колай оладжэк, некадар о касабайа.

Дюння каблетмер

16 Те, Бян сизи йоллэрым нидже койуннары йабаныларын арасына: олун ариф йылан гиби, хем зарарсыз гугуш гиби. 17 Корунун инсаннардан, зеря оннар вереджекляр сизи судлара, хем дюведжекляр сизи синагогаларында. 18 Хем гётюреджекляр сизи ёндерджилерин хем падишахларын ёнюня Беним ичин, мартурлук етмяя дейни оннарын хем язычниклерин ёнюндя. 19 Ачан вереджекляр сизи судлара, кахырланмайын, нидже, йаки не сёлейджениз, зеря озаман сизя вериледжек, не сёлейясиниз. 20 Хем лафедеджениз диил сиз, ама Бобанызын Духу сизин ичиниздя. 21 Кардаш кардашыны хем боба ушааны ёлюмя вереджекляр. Хем ушаклар кенди бобаларына хем аналарына каршы калкаджэклар, да оннары ёлдюрдеджекляр. 22 Беним адым ичин сиздян азетмейеджекляр, ама ким биткийадан дайанаджэк, о куртуладжэк. 23 Ачан сизи коолайаджэклар бир касабадан, качын башка касабайа, зеря дору сёлерим сизя, ани Инсан Оолу гелинджя, Израилинь касабаларыны долайламаа сиз етиштирямейджениз. 24 Юренджи диил таа бююк юредиджисиндян, хем чырак диил таа бююк кенди чорбаджысындан. 25 Етяр, ки юренджи олсун юредиджиси гиби, хем чырак олсун чорбаджысы гиби. Еер евин чорбаджысына Веелзевул (шейтан) дейярсалар, некадар таа чок онун евдекилериня дейеджекляр!

Кимдян коркалым?

26 0нуштан оннардан коркмайын, зеря йок бишей ёртюлю, ани ачылмасын, хем саклы, ани билинмесин. 27 Не сёлерим сизя каранныкта, ону билдириниз айдынныкта. Не ишидерсиниз кулааныза, ону хаберляиниз евлерин юстлериндян. 28 Коркмайын оннардан, ким гюдейи ёлдюрябилир, ама джаны ёлдурямяз. Таа пек коркун те ондан, ангысы вар насыл кайбетсин гюдейи да джаны да джендемдя. 29 Сатылмэр мы ики сачак кушу бир ассарийя (уфак парайа)? Ама оннарын бириси да еря дюшмяз, изин йокса Бобаныздан. 30 Сизин башынызда сачлар да сайылы. 31 Онуштан коркмайын, зеря сиз таа паалыйсыныз хепси сачак кушларындан. 32 Оля ки, хербирини, ким инсанын ёнюндя Бени таныдаджек, Бян да ону таныдаджам Беним Гёктеки Бобамын ёнюндя. 33 Ама ким инсан ёнюндя Бендян атыладжек, Бян да ондан атыладжам Беним Гёктеки Бобамын ёнюндя.

Гелмедим, гетирейим услулук

34 Дюшюнмеин, ани Бян гелдим гетирмяя бу еря услулук; гелдим гетирмяя диил услулук, ама кылыч. 35 Зеря Бян гелдим айырмаа оолу бобадан, кызы анадан хем гелини кайнанасындан. 36 Хем Адамын душманнары онун евдекилери. 37 Ким север бобасыны хем анасыны таа пек некадар Бени, о диил йакышыклы Бана; хем ким север оолуну еки кызыны таа пек некадар Бени, о диил йакышыклы Бана; 38 хем ким алмэр ставрозуну да гелмер Беним ардыма, о диил йакышыклы Бана. 39 Ким коруйаджэк джаныны, о кайбедеджек ону; ама ким кайбедеджек джаныны Беним ичин, о кооруйаджэк ону.

Ёдекляр

40 Ким кабледер сизи, о кабледер Бени. Ким кабледер Бени, о кабледер Ону, Ким Бени йоллады. 41 Ким кабледер бир пророку, ки пророк дейни, о кабледеджек пророк ёдяя. Ким кабледер бир дору адамы, ки дору дейни, о кабледеджек дору адам ёдяя. 42 Хем ким бу кючюклерин бириня, юренджим дейни, саде бир чашка суук су вереджек, дору сёлерим сизя, ани о ёдексиз калмайаджэк.

11

Иисус мартурлук едер Иоан Ватизедиджи ичин

1 Ачан Иисус башарды насаатларыны Кенди оники юренджисиня, гитти орадан насаат етмяя хем юретмяя инсаннары оннарын касабаларында. 2 Ачан Иоан капанда ишитти Христозун ишлери ичин, йоллады Она кенди юренджилерини, ки   3  сорсуннар: "Сянсин ми О, Ким лязымды гелсин, оса башкасыны мы беклейелим?" 4 Иисус джувап етти оннара: "Гидин да сёляйин Иоана, не ишидерсиниз хем не гёрерсиниз: 5 кёрлар башлэр гёрмяя, топаллар гезмяя, лепралылар пакланэрлар, саарлар ишидерлар, ёлюляр дирилерлар, факирляр ии хабер насаат едерлар. 6 Мутлу о, кимин ичин Бян кёстек олмайаджам". 7 Оннар гиттиктян сора, Иисус башлады аннатмаа инсана Иоан ичин:  "Не чыктыныз гёрмяя чолда (пустынедя)? Бир саз мы, ани люзгердян салланэр? 8 Не чыктыныз гёрмяя? Бир адам мы, йымышак рубайлан гиимни? Оннар, ким гиимни йымышак рубайлан, падишах евлериндя йашэрлар. 9 Озаман не гёрмяя чыктыныз? Бир пророк му? Cёлерим сизя, ани о таа бююк пророктан. 10 Зере одур, кимин ичин йазылы: „Те Бян йоллэрым Сенин юзюнюн ёнюня хаберджими, ангысы хазырлайаджэк Сана йол“. 11 Аслы сёлерим сизя: оннардан, ани карыдан дуудулар, йок башка биркимсей таа бююк Иоан Ватизедиджидян; ама Гёк Падишахлыында ень кючюю таа бююк ондан. 12 Иоан Ваатизедиджинин вакыдындан шиндиядак Гёк Падишахлыы куветлен алынэр, хем куведини койаннар ону казанэрлар. 13 Хепси пророклар хем Закон Иоандан илери сёледиляр, не оладжэк. 14 Хем истярсайдыныз буну каблетмяя, о вар Илийа, ани лязымды гелсин. 15 Кимин вар кулаа ишитмяя, ко ишитсин! 16 Кимя бензедейим бу бой инсаны? Оннар бензерлар ушаклара, ангылары отурэрлар мейданнарда да баарэрлар кафадарларына: 17„Чалдык сизя каваллан, ойнамадыныз; чалдык сизя кахырлы тюркю, ааламадыныз“. 18 Гельди Иоан, не ийярди, не ичярди, дерлар: „Онда вар фена дух“. 19 Гелди Адам Оолу, хем ийер хем ичер, дерлар:,Хобур хем ичкиджи, харччыларын хем гунахкерлерин досту!“ Хем арифлик белли олэр ишлериндян.

Вай пишмансыз касабалара!

20 Озаман Иисус чекетти айыплатмаа касабалары, ангыларында О чок кувет харджадыйды, зеря Аллаха дёнмедиляр: 21 "Вай сана, Хоразин! Вай сана, Вифсаида! Зеря еер Тир хем Сидон касабаларында йапылайды бу минунийалар, ани сиздя йапылдылар, оннар чоктан чуваллан гиимни хем кюл юстюндя отуруп, гунахларындан Аллаха дёнеджейдиляр. 22 Ама сёлерим сизя, ани суд гюнюндя Тир хем Сидон касабаларына таа илин оладжек, некадар сизя. 23 Хем сян, Капернаум, ани гёклеря калкмышын, джендемя дюшеджян; зеря, еер Содомда гёстериляйди те о минунийалар, ани сендя йапылдылар, Содом касабасы бююнкю гюнядан дураджейды. 24 Ама сизя сёлерим, ани суд гюнюндя Содом топраана таа илин оладжек, некадар сана".

Боба хем Оол

25 Озаман Иисус деди: «Ей Боба, гёкюн хем ерин Саабиси, шюкюр едерим Сана, ани бу ишлери сакладын ариф хем фикирли оланнардан, да ачтын оннары ушаклара. 26 Ей Боба! будур Сенин истедиин! 27 Боба Беним елимя хепсини верди, хем Бобадан кааре Оолу кимсей билмяз. Хем Бобайы да бири билмеер, Оолдан кааре, хем те оннардан кааре, кимя Оол истер ачмаа. 28 Гелин Бана хепсиниз йоргуннар хем юклю оланнар! Бян сизя раатлык веририм. 29 Алын юстюнюзя Беним бойундурууму, хем ююренин Бендян: зеря Бян йавашым хем услуйум юректян, да сиз джаныныза раатлык буладжэныз. 29 Зеря Беним Бойундуруум иидир, хем юкюм Беним илин".

9

Парализат адамы алыштырмак

1 Озаман О пинди кайаа, да гечип гёлю, Кенди касабасына гелди. 2 Да те, гетирдиляр Она дёшектя бир парализат хастайы.  Иисус, гёрюп оннарын инаныны, деди парализат адама: "Оолум, юреклен! Гунахларын аф олунэрлар". 3 Кийатчылардан кимиси дюшюндюляр: "Бу адам Аллахы кётюлер!" 4 Иисус, гёрюп оннарын дюшюнмеклерини, деди: "Нечин юреклериниздя фена дюшюнерсиниз? 5 Зеря не таа колай демяя: "Гунахларын аф олунду" му, оса демяя: "Калк, да ёрю" мю? 6 Ама билясиниз, ани Адам Оолунда вар кувет ердя гюнахлары аф етмяя, - сора парализат адама деди:  "Калк, ал дёшеени да гит евиня". 7 Парализат адам калкты, алды дёшеени да гитти евиня. 8 Буну гёрюп, народ шашты, да Аллахы метиннеди, ани вермиш бёля кувет адамнара.

Иисус чаарэр Матейи

9 Орадан гечяркан, Иисус гёрдю бир адам, ани отурарды харч топламак ериндя, Матей адыйды, да деди она: "Гел ардыма". Матей, калкып, гитти Онун ардына.   10 Ачан Иисус Матейин евиндя софрада отурарды, чок харччы хем гунахкерляр гелдиляр, да Онуннан хем юренджилериннен биля софрайа отурдулар.   11 Гёрюп буну, фарисейляр юренджилеря дедиляр: "Нечин сизин Юредиджиниз ийер харччыларлан хем гунахкерлярлян биля?" 12 Буну ишиттийнан, Иисус деди: "Доктор лязым диил саа адамлара, ама хасталара. 13 Гидин да юренин, нейя гелеер бу лафлар: „Бян истеерим аджыйаннык, ама диил курбан“. Зеря Бян гелмедим чаармаа доорулары, ама гунахкерлери (Аллаха дёнсюнняр)".

Оруч ичин соруш

14 Озаман гелерлар Она Иоанын юренджилери да дерлар: "Нечин биз хем фарисейляр чок оруч тутэрыз, ама Сенин юренджилерин оруч тутмэрлар?" 15 Иисус оннара деди: "Вар мы насыл кахырлансын дююнджюляр, ачан гювяя оннарын йаннарында? Ама геледжек гюнняр, ачан гювяя оннардан алынаджэк, озаман оннар оруч тутаджэклар. 16 Хем кимсей ески рубайа ени материйадан йама коймэр, зеря о йама ески рубайы таа пек йыртэр, да йыртык таа бююк олэр. 17 Хем долдурмэрлар ени шарабы ески тулумнара, зеря тулумнар патлэр, шарап та дёкюлер, тулумнар да зян олэр. Ени шарабы долдурэрлар ени тулумнара, озаман икиси да корунэр".

Хаста каарынын алышмасы, кызын дирилмеси

18 Ачан Иисус аннадарды бу лафлары, гелди бир заабит, да, баш иилдип Она, деди: "Беним кызым ёлмяя дурэр; ама гел да кой она елини, да о дири каладжэк". 19 Иисус, калкып, юренджилериннен биля онун ардына гитти. 20 Да те, бир кары, ани оники йыл зеетленирди кан акмасындан, йаклашты Она аардындан, да дииди рубасынын етееня. 21 Зере о аклынджа дейярди: "Салт диисям Онун рубасына, алышаджам". 22 Иисус, дёнюп, ону гёрдю, да деди: "Юреклен, кызым! Сенин инанын сени куртарды". Кары осаат алышты. 23 Заабитин евиня етиштийнан, Иисус гёрдю кавалджылары хем инсан  баарышыны, 24 да деди оннара: "Качын бир тарафа, зеря кыз ёлмеди, ама уйуйэр!" Оннар са гюлмяя алдылар Ону. 25 Ачан инсан чыкты дышары, Иисус йаклашты кыза, тутту елиндян, да кыз калкты. 26 Бу иш ичин хабер даалды бютюн о еря.

Кёрларын алышмасы

27 Ачан Иисус йолланды орадан, Онун ардына такышты ики кёр адам, да барардылар: "Иисус, Давидин оолу, аджы бизи!" 28 Ачан О етишти евя, кёрлар Она йаклаштылар. Иисус сорду оннара: "Инанэрсыныз мы, ани Бян вар насыл йапайым буну?"  Оннаар дедиляр: "Вар ниджя, Сааби!" 29 Озаман дииди оннарын гёзлериня да деди: "Инаныныза гёря ко олсун сизя!" 30 Да ачылды оннарын гёзлери. Иисус сымарлады оннара: "Бакын, билмесин кимсей!" 31 Ама оннар, чыкып, аннаттылар Иисус ичин бютюн о еря.

Дилсизин алышмасы

32 Кёрлардан сора гетирдиляр Иисуса бир дилсиз, бесноватый адам. 33 Ачан фена дух ондан чыкты, дилсиз башлады лафетмяя. Инсан, шашып, деди: "Бёля иш Израильдя йоктур олдуу". 34 Ама фарисейляр сёлярди: "О фена духлары коолэр фена духларын ёндерджисинин кувединнян!"

Ишчи етишмеер бичинтийя

35 Иисус гезярди кююлердя хем касабаларда, да юредярди инсаннары синагогаларда, хем аннадарды Падишахлыын Евангелийасыны, хем алыштырыды хертюрлю хасталыклары хем дертлери. 36 Гёрюп калаба инсан, джаны аджыды оннара, зеря оннар йоргундулар, хем даалмыштылар чобансыз койуннар гиби. 37 Озаман Кенди учениклериня деди: "Берекет бююк, ама ишчи ааз!" З8 0нуштан, дуа единиз берекетин Чорбаджысына, йолласын ишчи Кенди берекетини топламаа.