"ГАГАУЗИЯ ПРАВОСЛАВНАЯ". Церковный сайт из Конгаза

(В12) Священное Писание

14

Иоан Ватизедиджинин ёлюмю

1 О вакыт Ирод кулланыджы ишитти Иисус ичин, 2 да деди изметчилериня: «Бу Иоан Ватизедиджи! О дирилди ёлюлердян, онуштан йапабилер минунийа ишляр». 3 Зере Ирод, тутуп Иоаны, бааладыйды ону да аттыйды капана, Иродиаданын бетериня, ани Иродун кардашынын, Филипин, карысыйды. 4 Зеря Иоан таказаладыйды Ироду, дейеряк: «Дюшмеер йашайасын Иродиадайлан». 5 Ирод истеди ёлдюрсюн Иоаны, ама коркарды инсандан, зеря инсан сайарды ону пророк. 6 Иродун дуума гюню йортусунда, Иродиаданын кызы ойнады конакларын ёнюндя, да Ирод пек беенди. 7 Онуштан Ирод адады еминнян, ани вереджек кыза хепсини, не о истейеджек. 8 Юредилмиш анасындан, кыз деди: «Вер бана бир тепси ичиндя Иоан Ватизедиджинин кафасыны!» 4 Падишах гючленди, ама емин етти дейни конакларын ёнюндя, сымарлады версинняр не кыз истеди. 10 Йоллады, алсыннар Иоанын кафасыны капанда. 11 Да, гетирип кафайы тепсидя, кыза вердиляр, кыз да верди анасына. 12 Иоанын юренджилери, гелип алдылар Иоанын гююдесини да гёмдуляр, сора гидип Иисуса хабер вердиляр.

Беш бин адам дойурулэр

13 Буну ишидип, Иисус пинди кайаа да гитти орадан йалныз бир сапа еря. Инсан буну юренди, да, чыкып касабалардан, Онун ардына йайан гитти. 14 Индийнан кайактан, Иисус гёрдю чок инсан. Джаны аджыды оннара, да алыштырды хасталары. 15 Ачан авшам олду, юренджиляр йаклаштылар Она да дедиляр: "Бурасы чол ер, вакыт артык геч олду. Салвер инсаны, гитсинняр кююлеря да сатын алсыннар имелик кендилериня". 16 «Диил лязым гитсинняр, сиз верин оннара имелик», - деди Иисус. 17 Оннар дедиляр Она: «Бурада биздя вар салт беш екмек хем ики балык». 18 «Гетирин оннары бурайы», - деди Иисус. 19 Сора сымарлады инсан отурсун чимен юстюня. Алды беш екмяя хем ики балыы, калдырды бакышыны гёкя, иисёзледи да, кырып екмеклери, верди юренджилериня, пайетсинняр инсана. 20 Хепси идиляр да дойундулар, сора топладылар имяк парчаларыны, оники сепет долу. 21 Хепси, ким иди, карылардан хем ушаклардан кааря, варды беш бин адам.

Иисус гезер су юстюндя

22 Ондан сора Иисус изин етти юренджилериня пинсинняр кайаа да гечсинняр гёлюн ёбюр тарафына. Бу вакытта Иисус ляязымды салверсин инсаны. 23 Ачан салверди инсаны, пинди бир байыр юстюня, ки йалныз дуа етсин. Авшам олдуйнан, О йалныз орада булунурду. 24 Бу вакыт, кайык кенардан чок узакты да буушарды далгаларлан, зеря люзгяр каршы есярди. 25 Сабаа каршы, айдыннанаджэйкан, Иисус гелди оннара гезеряк су юстюндя. 14 Ачан юренджиляр гёрдюляр Ону, дедиляр: «Бу бир тылсым!» - да коркудан баардылар. 15 Ама Иисус деди оннара: «Усланын, бу Бяним, коркмайын!» 16 Петри деди: «Сааби, еер Сянсайдын, изин ет, гидейим Сана су юстюндя». 29 «Гел!» - деди Иисус. Озаман Петри инди кайык ичиндян да башлады гитмяя су юстюндя Иисуса доору. 27 Ама ачан гёрдю, ани люзгяр серт, коркту да башлады батмаа, озаман баарды: «Сааби, куртар бени!» 31 Иисус узатты елини, тутту ону да деди: «Аз инанджы, нечин икиледин?» 32 Ачан гирдиляр кайык ичиня, люзгяр дургунду. 33 Оннар, ким кайык ичиндяйди, баш иилттиляр Она да дедиляр: «Акына, ани Сян Аллахын Оолуйсун».

Генисареття хасталары алыштырмак

34 Гечтийнан гёлю, чыктылар кенара Генисарет ерлериня. 35 О ерлердян инсаннар таныдылар Иисусу, да йолладылар хабер доз-долайа, да инсаннар хепси хасталары Она гетирярдиляр. Хем йалвардылар Ону,  ки саде Онун рубасына диисинняр, хем ким дииди, о алышты.